Albert Ojwang: Wakenya Wakerwa na Hatua ya Babake Bloga Kukubali Mchango wa Ruto

• Wakenya mitandaoni wamegawanyika baada ya Rais William Ruto kumpa KSh milioni 2 baba aliyefiwa, Meshack Ojwang
• Wengine walimkosoa Meshack Ojwang kwa kukubali mchango huo licha ya harambee ya awali ya umma, huku wengine wakimtetea
• Wengi waliona hatua hiyo kama ya kisiasa, lakini baadhi walihimiza huruma na uelewa kwa baba anayekabiliana na huzuni kuu

Wakenya kwenye mitandao ya kijamii wameonyesha kutoridhika baada ya babake Albert Ojwang kupokea msaada wa kifedha kutoka kwa Rais William Ruto.

William Ruto alifanyia nini familia ya Albert Ojwang'?

Akizungumza na wanahabari siku ya Jumatatu, Juni 17, Meshack Ojwang alieleza mazungumzo yake na Rais Ruto, na kumshukuru kwa msaada aliotoa kwa familia yao.

"Ningependa kuchukua nafasi hii kumshukuru Mungu. Tunamtegemea Yeye. Ruto alimchukulia mwanangu kama wake mwenyewe. Wengi wamekufa, lakini yeye aliamua kunipigia simu na kunifariji," alisema Meshack.

Aidha, Meshack alisema kuwa Raila Odinga pia alipiga simu kutoka ng'ambo na kutuma rambirambi zake.

Ruto alitoa mchango wa KSh milioni 2 kwa familia, huku Raila akitoa KSh milioni 1.

Gavana wa Homa Bay, Gladys Wanga, pia alitembelea familia hiyo na kuahidi kujenga nyumba ya vyumba viwili kwa ajili yao, yenye thamani ya KSh milioni 1.5.

Aliahidi kwamba ujenzi huo ungeharakishwa ili ukamilike ndani ya wiki mbili na nusu, kabla ya mazishi.

Mitandaoni, baadhi ya Wakenya walikosa kufurahishwa na hatua hiyo, wakitaka baba ya Ojwang' arejeshe fedha walizochangisha kwa ajili ya familia hiyo.

Hata hivyo, wengine walimtetea baba huyo aliyefiwa, wakisema kwamba kukataa fedha hizo hakuwezi kuwa suluhisho, na kwamba alikuwa bado ana jukumu la kulea mjukuu na kusaidia mjane wa mwanawe.

Baadhi ya maoni kutoka kwa Wakenya mtandaoni ni:

rockroyce001: “Anirudishie tu KSh 300 yangu isichanganyike na hizo zingine.”

purse0nality_by_ess: “Tumpatie nafasi kidogo; kizazi chao hawajui zaidi. Hii vita ni yetu!”

gloria.tunu: “Mzee, huu ni wakati wa kunyamaza kidogo tafadhali.”

gloria.tunu (tena): “Hivi wazazi wetu wanaweza kutusaliti hivi? Siamini bado.”

steve_muriuki: “Hata akikataa hiyo pesa, haitarudisha mtoto wake. Riggy G alisema pesa ikikuja, usikatae mradi usisahau.”

korea_mamasky: “Wacheni aomboleze kwa amani. Kukataa pesa si kipimo cha kutafuta haki. Analea mjukuu na kumsaidia mjane wa marehemu. Huo msaada ulikuwa tu ni sadaka. Uchungu wenu hauelekezwi mahali sahihi.”

musau_erique: “Kweli pesa ilimsaliti hata Yesu.”

Eric Omondi alisema nini kuhusu viongozi?

Kufuatia kifo cha Albert Ojwang’ akiwa mikononi mwa polisi, Eric Omondi, mchekeshaji wa zamani aliyegeuka kuwa mwanaharakati, alitoa tamko kali dhidi ya uongozi wa kisiasa nchini Kenya.

Aliweka picha yenye ujumbe mzito akiwa amevaa fulana ya mistari ya wafungwa na akiwa ameinua mkono mmoja uliofungwa pingu moja, ishara ya kujinasua kutoka kwa utawala wa kimabavu.

Katika ujumbe wake, Eric alitangaza kuanza kwa enzi mpya ya Kenya, akiifananisha hali ya sasa ya taifa na uchungu wa kuzaa kabla ya mtoto kuzaliwa.

Aliwalaumu viongozi kwa ufisadi, ukabila, na ukatili, na kuwataka wakamilishe mihula yao na waondoke madarakani.

Ujumbe huo wa ujasiri ulipokelewa vyema na Wakenya wengi, waliomsifu kwa ujasiri wake na hata kumshauri agombee kiti cha siasa mwaka 2027, ili kusaidia kuliongoza taifa kuelekea mabadiliko ya kweli na uwajibikaji.

Read ENGLISH VERSION

Je, unayo taarifa ya kusisimua ambayo ungependa tuichapishe? Tafadhali, wasiliana nasi kupitia [email protected] au WhatsApp: 0732482690.

Chanzo: TUKO.co.ke